This month an neist month the Reyal Society o Embra is haudin a wheen o talks an twa-wey gaitherings sib tae the Scots leid, an tae langage maiters in general. On Friday 6 Mairch 2026, fae 6pm til 7.30pm, the’ll be an online talk cryed ‘The History of Scots and English in 10 objects’ bi Professor Jeremy Smith. Professor Smith will vizzie sindry objects fae bygane times for tae shaw whit thay can tell us anent langage an hoo langage wis seen an used. Follaein on fae this, on Friday 13 Mairch, fae 6pm til 7.30pm, the’ll be a gaithering o kenspeckle feegurs tae speak anent Scots cryed ‘The hail clanjamfrie: What’s so braw aboot Scots’. Takkin pairt will be screivars Len Pennie, Chris McQueer, an Michael Pedersen giein walings fae thair wark, baith poyems an prose, an makkin a puckle remarks alang the wey. For langage maiters braid Scotland, the’ll be a gaithering on Friday 20 Februar, 6pm til 7.30pm, cryed ‘Celebrating Scotland’s languages with New Scots’ that will tak in Sign Langage, Gaelic, Scots, an ither leids syne brocht tae Scotland throu fowk flittin. Memmers fae New Scots communities will be on haun tae gie fowk a pree o thair leids an cultures. Sib tae this, on Seturday 21 Februar, 6pm til 7.30pm, the’ll be an online talk cryed ‘If we lose our languages do we lose ourselves’ that looks at hoo a leid, ony leid, can chenge ower time an whither oor sense o whaur we belang tae chenges alang wi it. On Wadensday 11 Mairch, fae 6pm til 7.30pm, the’ll be a twa-wey warkshop cryed ‘Seeing how speech sounds are really made’ that will mak uiss o ultrasoond for tae shaw hoo consonants in Scots speech is makkit, an whaur the tongue bides whan this happens. This will be hostit bi Professor James M Scobbie.

Aw thir haunling is free ingait for onybody ower the age o 16, but a body maun buik a ticket aforehaun tae be shair o a space. Aw in-person gaitherings will be at 22-24 George Street, Embra. For mair anent the haunling, please speir bi gait o the Reyal Society email public_engagement@theRSE.org.uk or clap yer device on https://rse.org.uk/whats-on/ the wabsteid.

The’r a soond file o this story in Scots abuin.