Oor Wullie an The Broons is 90 year auld this Mairch. Thay first kythed atween the pages o The Sunday Post on 8 Mairch 1936, an gied readers a terr fae the stert, no jist for the humour, but acause the crack wis wrutten maistly in Scots. Ower the years the Scots whiles dwyned, as in the 1970’s an 1980’s, an Soothron grew in maucht, but the Scots wad aye stot back again. The Broons is a faimly steidit at 10 Glebe Street, in the toun o Auchenshoogle, wi Maw an Paw Broon at the heid, alang wi Maggie, Hen, Joe, Horace, Daphne, the twins an the bairn. Oor Wullie is the gallus, jaggie-heidit leader-aff, aye jinkin the polis PC Murdoch, alang wi freens Fat Boab, Soapy Soutar, Wee Eck, an the like. The first airtist wis Dudley D Watkins, that drew the characters fae 1936 until his deith in 1969. He drew cairtoons for The Dandy an The Beano forby. In 2023 The National Leebrar o Scotland coft the first ever Broons annual – fae 1939 -  an noo haes hit as pairt o its ordnar ootset. For tae see in the anniversar, the’ll be year-lang haunling bi DC Thomson, takkin in community days, split-new warks tae be furthest, an feature airticles in The Sunday Post.

The’r a soond file o this story in Scots abuin.

Photie: The National Leebrar o Scotland, 1939 Broons Annual