The’r a bittie disappyntment ower The Sheuch the noo anent the want o ony statutor inrowment throu the Scots leid, for births, mairrages an deiths. Syne, in 2022, a walcome heize wis gien til Earse Gaelic whan it wis alloued tae inrow throu the leid.  Hooanever, no lang syne, whan Norland Irland assemly memmer, Diane Forsyth, speirt at the Depairtment o Finance, (that haes the burden for the General Register Office), she wis tellt that the war nae siclike ettles on behauf o the Ulster Scots dialect. A speaker on behauf o the Boord o Ulster Scotch walcomed the speir bi the assemly memmer, an threapit tae the press, bi gait o The Irish News, that unner the European Chairter the shuid be proveesion o this ilk for the leid, an that in the 2021 census the war near-on 21,000 fowk returnt cuid speak, read, write or unnerstaun Scots in Norland Irland. The speaker for the Boord eikit that thay wad be gled tae collogue wi the Depairtment o Finance for tae forder this maiter. 

The’r a soond file o this story in Scots abuin.