No lang syne the versities o Queen’s, Belfast, an Ulster, wis in hauns wi an opeenion speir that, amang sindry heids an pynts, speirt anent the Earse Gaelic an Scots leids forby. Cryed The Northern Ireland Life and Times Survey (NILT), in 2025 it speirt at 1, 244 fowk ower the age o 18 for tae tak the souch o them anent sindry heids. The speir fund that uphaud for Gaelic wis maist strang amang fowk atween the ages o 18-44, while for the Scots leid in Ulster uphaud cam maistly fae fowk atween 25 an 44. Whan it cam tae men an weemen, the speir fund that weemen mair nor men wantit Gaelic an Scots comprehendit in the scuils. Ower aw, 45% o fowk speirt at threapit that learnin Gaelic in the scuils wis guid for bairns, while 31% gree’d the like for Ulster Scots. Amang the best weys tae learn the leids, fowk pyntit tae bidin in, or makkin veesits tae, hertlands or Gaeltacht airts whaur the indwellars is versant. Anent the kenspeckle political an releegious backgrunds, the speir fund that the war less differs atween Catholic an Protestant fowk in Ulster nor jaloused, wi 46% o Protestants, an 40% o Catholics, greein that Ulster Scots wis a braw chuckie tae the Ulster cairn. Dr Paula Devine, that’s the director o the NILT speir, commentit that, gien the uphaud for the twa leids thir bygane years, the speir wis a timeous windae on the culture o Norland Irland.

The’r a soond file o this story in Scots abuin.