A week’s a lang whilie in politics, gaes the saw. An for Gaelic an Scots speakers it’s been a lang, thochtit week ower the heid o a stoushie steert up wi the Reform pairty. Appearinly, the causay clash oot o Lunnon wis that, unner chenges tae vote laws proponed bi Reform, Gaelic an Scots speakers wad get liftit an gien the jyle for furthsettin election blads, or ithergaits forderin pairties, throu thae leids. A body cuid pit the kettle on for the political onfaw. Baith the Scots National Pairty an the Green Pairty, an sindry cultural bodies, cawed Reform for awthing, threapin on narra-nebbit ethnic ploys. But turn aboot, Reform contert the haed been a mishanter. Appearinly, Reform haed wantit tae mak chenges tae the Representation of The People Bill, that wad see only the Soothron an Welsh leids as lawfae for campaigns. A body for Reform said that the ettle o the chenges wis for Ingland an Wales alane. Hooanever, as the act is, for ordnar, for aw the kintras o the UK, the wording set doun wis faur fae clear an wad’a steert an unco fash ayont the Tweed. Reform threapit the haed been a paper maxie an that the wording haed noo been chenged aince mair. Max Bannerman, ane o the Reform memmers in Halyrood, statit that the ettle ahin thir chenges is tae see that aw elections is done throu the hamelt leids. He thocht that the SNP government haedna gien eneuch beild tae the aulder hame leids an this wis whit wey he wis ettlin tae pit forrit a bill in Halyrood that wad see Soothron, Gaelic, an Scots, as the only lawfae leids for elections in Scotland in time tae come. 

The’r a soond file o this story in Scots abuin.

Photie: Fae Hoose o Commons Flickr accompt.