Claire White haes been appyntit the split-new screivar steidit at the National Leebrar o Scotland. In a pairtnership atween the National Leebrar an Scotland Makkin (Creative Scotland), Claire White will haud the post o Shaetlan Screivar. The post o Scots Screivar haes in bygane years been representit wi sindry fowk oot o Dundee an Angus, Dumfries an Gallowa, the North East, an Orkney, for tae shaw the Scots leid as spoken an wrutten fae aw the airts. Claire White is a sang screivar an fiddle player that’s weel-used tae makkin braidcasts anent the leid. Ower a wheen o year she haes braidcast radio shaws anent the ‘Midder Tongue’ in Shaetlan, an in 2018 brocht oot an album cryed ‘Lasses Trust in Providence.’ White is a thrang body, haudin storytelling an sang warkshops in the feck o scuils in Shetland for years forby makkin materials for lare an online films o Scots sang. Throu her post as Screivar, White will be makkin split-new warks in Shaetlan an giein a heize tae the Scots leid as a hail.