Aw thaim wi an intress in the Scots leid that finds thairsels in aboot Embra this August micht like tae tak in a new shaw that’s on at the Embra Freenge the noo. Cryed Common Tongue, an wrutten bi Fraser Scott, the play taks us throu the life o a lassie cryed Bonnie, played bi Olivia Caw, an the narra-nebbitness that Scots speakers is affen up agin. Whiles sair, an whiles a lauch, it maks the pynt that no lang syne tae speak Scots wis thocht wirking cless an that, tae get aheid, a body haed tae speak the Soothron, in Scotland. Caw’s character shaws us the chenges thir bygane years, an hoo speakers is haudin-gauin nooadays wi a new foushion, ken.

Common Tongue is on at the Storytelling Centre for Scotland, 43-45 Heich Gait, atween the 7t an 31st August 2026. Shawings is on at 14.45pm ilk day, but for the 12t, 19t an 26t. Ingait is £16.00 (£14 for the less-sillert) an a body can coff tickets bi clappin a device on www.edfringe.com or bi giein them a phone on 0131 226 0000. Please tak tent that the shaw is suitit for awbody ower the age o 12.