The’r a new stoushie atween the preses o the Unitit States o Americae, an the government o Iran, anent the caws tae doun wappons an haud a trew. Iran haes pit forrit 10 airticles or heids tae end the weir, an threaps that ony greement for a trew maun comprehend Lebanon. In the bygane week, Israel haes lichtit on Lebanon in its ongauin fecht agin Hezbollah, wi the affcome o ower 200 fowk deid an a 1,000 skaitht. Preses Trump haes threapit that Lebanon wisn pairt o ony crack the noo tae doun wappons, but Iran haes claimed ithergaits. Preses Trump said that Iran haed gree’d tae open the kyles o Hormuz aince mair – an lat yle tankers an ither fraucht throu – but appearinly Iran haed threapit on Lebanon as pairt o ony sic troke. As the fecht shougles mercat pegs the braid warld, the USA an Iran is awa tae haud a tryst in Pakistan tae see whither the micht be some wey forrit tae end the weir.

The'r a soond file abuin o this story in Scots.

Photie: kyles o Hormuz bi Jacques Descloitres (NASA)