In Scotland, the affcome o the 2026 Halyrood election is noo in, an the pairlament is mair mixtie-maxtie nor ever. The Scots National Pairty noo haes 58 memmers (doun fae 64), an the Scots Green Pairty 15 (up fae 8), sae that the feck o MSPs – 73 awthegither – hauds tae the policy o  a freestauning Scotland. Contergaits tae this, the pairties that hauds tae the union wi Ingland noo nummers 56. The Labour Pairty (doun fae 22) an the Reform Pairty is baith nummers wi ane anither at 17, while the Tory Pairty took a paikin, throu losses tae Reform, an is doun tae 12 memmers fae 31. The Leebral Democrat Pairty haes 10 memmers (up fae 5) haein tint Shetland tae the SNP but takkin twa fae thaim turn aboot. Mair nor ever, Scotland is sindert, but it maun be said that the nummers o fowk gauin oot tae vote is weel doun – wi jist 53% o inrowed voters turnin oot. Aince mair, John Swinney will haud office as First Meenister at the heid o an SNP government wirkin whiles wi the Green Pairty on sindry maiters. 

The’r a soond file o this story in Scots abuin.