The nummer o deiths throu the yirdquakes in Venezuela haes noo gane ower 3,300 sowels (at 6 Jooly), wi ower 16,000 fowk hurtit, an as mony as 50,000 mair tint an no accoontit. The twa yirdquakes, at 7.2 an 7.5 o the calcul, strak the midland an norland pairts o the kintra on 24 Juin bygane, wi the second ane daein muckle skaith tae La Guaira an Caracas, cawin doun biggins, heich flats, an ither warks reckont at billions o dollars. Wi caurs an causays, flicht havens, hospitals an railweys aw takkin a dreidfae sair dunt, it haes been a sair fecht for ony human services tae get in aboot an gie remeid. Delcy Rodríguez, that’s the national preses atween hauns, haes pit the kintra on an emergency staunce, while sindry bodies an kintras the braid warld, the Unitit Nations comprehendit, haes sent aid warkars alang wi geir an graithen for tae seek ony mair that micht’a won ower the ruinage.

The’r a soond file o this story in Scots abuin.

Photie: Cairte o Venezuela bi Darwinek.