Wang Yi, Cheena’s meenister for fremmit maiters, haes taen a gangroond o the Nordic kintras. No lang syne, he wis in Denmark, Swaiden, an Finland, an jist this week bygane forgaithert in Upslo, Norrowa, whaur he wis gien walcome bi Heid Meenister o Norrowa Jonas Gahr Støre. The Heid Meenister o Norrowa spak anent the drumlie state o the warld, an the want o mair kintras wirkin thegither anent common ettles. In parteeclar, the war crack anent Cheena’s yle an gas troke oot o Roushie whan maist o the lave o the warld haed gien a cauld shouder ower the heid o the weir agin Ukrain. Støre wis wantin Cheena tae jyne ploys tae see the weir endit, but wis blate anent whit Meenister Wang Yi haed tae say. Yi’s veesit comes mair or less at the same time as the heich gaithering o NATO in Turkey, an law makars in Norrowa haes askit that Cheena no gie uphaud tae Roushie. Amang ither maiters in hauns wi, Cheena’s pairt in bringin doun climate skaith wis awned, wi Cheena pittin muckle geir intae sun an wind-pouer projects. The war some crack anent the want o ony greement for free tred atween the twa kintras, wi Norrowa threapin thon wad lippen on Cheena signin up tae warld treaties anent human richts – a controvertit maiter that in bygane years has whiles left the twa cauldrife.

The’r a soond file o this story in Scots abuin.

Photie: cairte bi NordNordWest.