Ice-lowsings haes lang kythed antrin cheils fae bygane ages, that we modrens ferlie at. Ane o the maist namely is Ötzi, the sae-cryed iceman, that wis fund in the Alps striddlin the mairch atween Austrich an Italy, in 1991. At first thocht tae be a modren deith, it turnt oot that Özti wis ower 5,000 year auld. His claes, geir an wappons wis weel-hained unner the ice, an he wis aboot 45 year auld whan he dee’d. The arraheid fund in his shouder shawed that he haed been hurtit tae the deith. But aiblins ane o the maist important facts we learnt aboot his time wis fae the 61 tattoos on his bouk thocht tae mark oot whaur his banewrack wis giein him jip sae that healers micht wirk on him whitever airt he gaed.

Throu climate chenge, ice-lowsings haes become ever mair common, an mony o the ice-keppit reenges o auld stauning is noo dwynin awa an giein up the ghaists o langsyne an modren days baith. For ae instance, in the simmer o 2026 the corps o twa Belgian muntaineers wis fund in the Trift ice-kep, in the canton o Bern, Swisserland. The twa men haed vainisht back in 1992 an micht never’a been fund again but for the ice-lowsing giein them up. It wis throu this that the Swiss polis cuid run DNA tests an at lang an last gie an answer for the faimlies left hert-sair aw thir years. The polis in thae pairts haes been keepin a database o lang-tint fowk fae 1925 onwards an said that it’s a dowie fact that as mair ice-keps haes lowsed, mair o the deid haes been gien up.

Photie o the Trift ice-kep taen in 2014 bi Andreas Faessler.