Muckle fludes tore throu norland Nepal, an Tibet, on 26 August 2026. The springheid o this vis major wis pairt o the Langtang Lirung ice-kep in the Himalayas brekkin aw a sudden. In cawin itsel apairt, the ice-kep lowsed sic a volume o watter that it scoored the land, upliftin aw kin kind o deidly bruck an teirin throu ony brig, road, toun or village tae the pure ruinage o awthing in its road. The lave o the warld haes been left stammygastert at the sindry videos o flegsome jaws o watter an slidderin glabber. Tae date (4 Sep) ower 1,300 fowk haes been killt an ower 5,300 tint in Nepal, an neeborin Tibet. A gey wheen o the deid haes been cairried awa throu watters the length o Indie. Muckle lowsings o glabber haes sliddert an yirdit hail touns alang the mairches atween Cheena an Nepal, leain thaim that’s won ower tae plowter best thay can. Syne, the government o Nepal haes brocht oot near on 9,000 fae the airmy, an awmaist 8,000 polis, tae gie remeid an look for fowk that micht’a won ower. Prime Meenister o Nepal, Balen Shah, gaed tae the Nuwakot districk for tae owersee wark an pledge relief siller. In Nuwakot an Dhaling, camps haes been estaiblisht for the hameless while the airmy is in hauns wi biggin brigs that will see relief brocht in. Ower the border in Tibet, the government hameaboot haes been wirkin wi General Pairty Secretar an National Preses o Cheena, Xi Jinping, for tae bring thegither airmy, polis an relief warkars an Cheena haes been fleein in meat an maut for fowk in baith Nepal an Tibet. Ane o the maist important warks haes been the ettle tae purify eneuch watter for fowk tae drink for dreid o disease brekkin oot.

Photie shaws flude an glabber as it hut Gyirong Port.