It is the anniversar o the deith o Alisaunder Ross, at Lochlee, on 20 Mey 1784. Ross is a kenspeckle body amang the screivars o Scots in the 18t century, an striddles the North East an Angus. Born at Torphins in Aiberdeenshire, in 1699, he belanged a faimly of fermers, but syne gaed tae Marischal College in 1714 an efterwards becam a teacher. In 1732 he wis appyntit the dominie at Lochlee, in Angus, an bade thare til he dee’d in 1784. Ross wis acquent wi screivars in Scots fae bygane days an whiles wrate his ain verse in Latin an Scots. In 1768 he set furth his heidmaist wark cryed Helenore, or The Fortunate Shepherdess, an it is for this wark that he is maist namely. Wrutten in verse, it is a love story set in the Heilands, an in its day wis weel-quotit bi readers, amang them nae less a feegur nor Rabbie  Burns. Nooadays, veesitors tae the kirkyaird at Lochlee, in Glen Esk, can see the memorial biggit ower whaur Ross is yirdit.

The'r a soond file o this story in Scots abuin.