The’r a shaw anent Burns on the noo at the Embra freenge that’s haed braw write-ups o late. Cryed The Burns Project, it wis wrutten bi screivar James Clements, an he plays the makar hisel. Clements an ither speirars, wirkin oot the National Trust for Scotland, raikit for the bit screivings an letters that Burns left ahin, an the shaw is grundit on thir papers. On ingait, a body gauin ben hears walings o poyems, an interviews fae modren speirars, that’s braidcast oot o speakers plankt aboot the chaumers. Clements acts oot his pairt aroond a muckle buird set tae look the style o thae times, an is jyned bi Lisa Rigby an Ray Aggs that maks the music an sang. Atween the three o them, an the soond recordings abuin, a braid picture o Burns as a fermer, makar, an sangstar – wi aw his promisky fauts - is pentit, an we doot that follaers o Burns will be delichtit. Please tak tent that the shaw haes intil’t strang an sweirie langage, alang wi antrin crack aboot gender, sexual-airtans, race, an enslaved fowk.

The Burns Project is shawin at The Royal Lyceum shawhoose, Grindlay Street, Embra, fae Tuesday 30 Juin until Sunday 5 Jooly 2026, wi baith efternuin an eening shawings. For mair wittins o this, buikings, an times, please speir at the Lyceum box office, either bi phone on 0131 248 4848, or bi gait o email boxoffice@lyceum.org.uk .

The’r a soond file o this story in Scots abuin.