The St Aundraes Heritage Museum an Gairden haes an ootset on the noo anent the Scots leid. Steidit in a 17t century hoose, at 12 North Street, St Aundraes, in Fife, the ootset is cryed Hamewith, an it runs fae 8 Jooly 2026 until 25 Januar 2027. The ootset vizzies the leid agin the backgrund o hame, fowk an landscape, wi veesitor wittins gien throu the leid, but the’r owersettins in Soothron forby for thaim that’s no versant. The ootset maks the gey important pynt that, in a kintra whaur Scots wis dounhauden thir bygane twa-three hunner year, it wis maistly at hame whaur the leid wis freely spoken an passt on gree bi gree. The’r inpit here fae bairns, scuils, makars an storytellers. Throu the simmer halidays the’ll be a bittie haunling on parteeclar days at 2pm. On Wadensday 8 an 15 Jooly, Sheena Wellington will be haudin warkshops anent Scots sang. On Wadensday 29 Jooly, an 5August, Sheila Kinninmonth will be speakin anent stories in Scots, an the street sangs an gemms that wis aince common, an on 29 Jooly Peter MacKay will be haudin a warkshop for Scots poyetry.

Ingait tae the museum is £7.50 for adults (or £5 for the less-sillert) an £2.50 for a bairn. It is open for ordnar ilk day (but Tuesdays) atween 10.30am an 16.00pm. Please clap yer device on www.standrewsmuseum.com for tae ken mair.

The’r a soond file o this story in Scots abuin.