The wab is baith a ferlie an a curse. Stravaigin online for faimly history micht thraw up some uissfae information, but caw cannie on whit sources ye lippen til. The’r mony wab pages, affen hostit bi gait o Americae, that’s faimly history is taen an pastit fae chancy sources. Ye micht find a page that threaps ye’r sprung fae a king, an gin ye reckon this is ower guid tae be true, it likely is. This is ane o the common problems wi reddin oot yer kin – the search for kingly forebears.

Jalousin ye micht be sprung fae a king or queen, or aiblins a noble wi a teetle, is a common reason for reddin oot kin. It’s no hard tae see whit wey. Until no lang syne it wis maistly heritors an sillert fowk that fasht wi sic cheils, for tae eik tae thair social stauning while fermers an warkars haed nae uiss for sic knawledge. But haein a king in yer backgrund, or some noble kenspeckle in history, is faur mair romantic nor a fermer or tredsman that naebody ither haes heard aboot. For this reason ye’ll whiles find online chancy faimly trees that’s been steekit an hung thegither on nae mair nor causay clash, wi nae sources quotit ither nor a tradeetion that micht’a been made up twa-three grees back. Sae if a contact or kizzen threaps that ye’r sprung fae a king or weel kent body oot history, but canna shaw ye the richt lines, caw cannie.